Hovudvindauge

Hovudvindauget i Graphs er delt i to: eit sidepanel til venstre med elementlista og kontrollane, og eit lerret til høgre der figuren vert vist.

Sidepanel

Sidepanelet inneheld alt som har med handtering av element og samhandling med figuren å gjere.

Knappar i toppfeltet

Øvst i sidepanelet er toppfeltet, med ein knapp for å leggje til data, ein knapp for å opne figurinnstillingane og ein knapp for hovudmenyen. Knappen Legg til opnar ein meny med tre val:

Legg til data frå fil …: Opnar importvindauget for å laste eit datasett frå ei fil eller ein database. Sjå Leggje til datafor detaljar om formata som er støtta og vala ved import.
Legg til likning …: Opnar eit vindauge for å leggje til eit nytt likningselement, som vert teikna samanhengande på lerretet.
Generer data …: Opnar eit vindauge for å generere eit fast datasett frå ei likning over eit x-område du kan velje.

Hovudmeny

Hovudmenyen øvst til høgre gjev tilgang til nokre generelle val:

Nytt prosjekt: Opnar eit nytt, tomt prosjekt i eit nytt vindauge.
Lagre prosjekt / Lagre prosjekt som …: Lagrar det gjeldande prosjektet i ei fil, med alle elementa, figurinnstillingane og heile historikken for angring og vising.
Opne prosjekt …: Opnar ei tidlegare lagra prosjektfil.
Lukk prosjektet: Lukkar det gjeldande prosjektet og går tilbake til eit tomt prosjekt.
Eksporter data …: Eksporterer dei gjeldande datasetta til ei fil.
Eksporter figur …: Eksporterer figuren som eit bilete.
Stilredigering: Opnar vindauget for stilredigering. Sjå Stilarfor detaljar.

Figurinnstillingar

Knappen for figurinnstillingar øvst til høgre i sidepanelet opnar panelet for figurinnstillingar, der du kan setje figurtittel, aksetitlar, aksegrenser, akseskalaer, synlegheit og plassering av teiknforklaringa og den aktive stilen. Aksetitlar og aksegrenser vert berre viste for aksane som er i bruk. Dei gjeldande figurinnstillingane kan lagrast som standard for nye prosjekt med knappen Set som standard nedst i panelet.

Modusar for lerretet

Under elementlista finst det tre modusar for samhandling med lerretet:

Panorer: Klikk og dra på lerretet for å panorere visinga. Dette er standardmodusen.
Zoom: Klikk og dra for å teikne eit rektangel på lerretet for å zoome inn på det området.
Vel: Klikk og dra for å markere eit område i dataa. Dataoperasjonar vil berre påverke dataa innanfor det markerte området når denne modusen er aktiv.

Operasjonar

Under modusknappane for lerretet gjev operasjonspanelet rask tilgang til alle handlingane for datahandsaming. Dei verkar på alle dei valde elementa. Sjå Handsame datafor ei fullstendig skildring av kvar operasjon.

Lerret

Lerretet viser plottet med alle dei aktive elementa. Klikkar du éin gong på etiketten eller grensene, vert figurinnstillingane opna med fokus på det du klikka på, slik at du raskt kan justere.

Øvst til venstre er knappane for å angre og gjere om. Øvst til høgre på lerretet er visingsknappane. Pila bakover tek deg til den førre visinga etter at du har endra grensene, og pila framover tek deg til den neste visinga etter at du har klikka på pila bakover. Til slutt prøver knappen for å optimalisere grensene å justere grensene automatisk slik at alle synlege element får plass på lerretet. For likningar vert berre y-området rekna med, sidan x-dataa strekkjer seg over eit uendeleg område.