Liburutegi-iturburua

Liburutegia Rhythmbox musika-erreproduzitzailearen iturburu nagusia da, zuk Rhythmbox musika-erreproduzitzailera inportatutako musika-fitxategi guztiak dauzkan datu-basea (Liburutegiak zure musika-fitxategietarako bide-izena gordetzen du, ez fitxategiak berak).

Liburutegiak, zure ordenagailuan fisikoki dauden musika-fitxategiez gain (zure direktorio NAGUSIAZ gain, esate baterako), urruneko sare-zerbitzuen bidez erabilgarri dauden musika-fitxategiak ere eduki ditzake. Onartutako sare-zerbitzuen adibide batzuk :

  • FTP publikoa
  • Autentifikatutako FTPa
  • NFS
  • Windows partekatzea

Liburutegian inportatutako fitxategiak pista-zerrendan azaltzen dira, pistetan kapsulatutako etiketetan gordetako informazioarekin (artistaren izena, albumaren izena...). Rhythmbox musika-erreproduzitzaileak pistak modu antolatuan bistaratzeko erabiltzen ditu etiketa horiek.

Etiketak aldatzeko, aukeratu Musika ▸ Propietateak, eta eman xehetasunak azaltzen den leihoan.

5.1. Gehitu pistak Liburutegian

Liburutegian pistak gehitzeko, hainbat metodo daude:

  • Pista bat inportatzeko, aukeratu Musika ▸ Inportatu fitxategia menutik, eta hautatu fitxategia fitxategi-hautatzailean, eta sakatu Ireki botoia.
  • Karpeta bateko hainbat musika-fitxategi inportatu nahi badituzu, aukeratu Musika ▸ Inportatu karpeta menuan, hautatu karpeta fitxategi-hautatzailean, eta sakatu Ireki botoia. Karpetako musika-fitxategi guztiak eta haien azpikarpetak inportatuko dira.
  • Arrastatu eta jaregin fitxategiak fitxategi-kudeatzailetik (Nautilus-etik, adib.), Rhythmbox leihoan.

Direktorioak behatzeko funtzioa gaitu baduzu (ikus 14.1.2. atala ― Musika), aukeratutako direktorioan gordetako musika-fitxategi guztiak gehituko dira Liburutegian. Geroago gehitutako fitxategi berriak ere gehituko dira.

5.2. Kendu pistak Liburutegitik

Pista bat liburutegitik kentzeko baina diskoan mantentzeko, aukeratu Editatu ▸ Kendu. Pista eta bere propietateak (balorazioa, erreprodukzio kopurua....) Rhythmbox datu-basetik kenduko dira.

Pista bat bai Liburutegitik eta bai diskotik kentzeko, aukeratu Editatu ▸ Bota zakarrontzira. Pista aurreko moduan kenduko da, baina fitxategia fitxategi-kudeatzailearen zakarrontzira eramango da.

5.3. Aurkitu pistak bilaketa bidez

Rhythmbox aplikazioak bilatzeko funtzio bat du, zuk pistak bilaketa-termino batzuen bidez aurkitu eta iragazi ahal izan ditzazun.

Sartu testua bilaketa-koadroan, eta, idatzi ahala, sartutako testuarekin bat datozen pistak bakarrik bistaratuko dira. Bilatzeko funtzioak Liburutegian gordetako pista guztien etiketa guztietan bilatzen du.

Bilaketa zehatzagoa egiteko, etiketa jakin batzuetan bakarrik bilatzea aukera dezakezu (Artistak, Albumak edo Tituluak).

5.4. Aurkitu pistak arakatzailearekin

Arakatzailearekin ere aurki daitezke pistak. Arakatzailea bi edo hiru paneleko ikuspegia da; aukera ematen du musika-generoetan, artistetan eta albumetan nabigatzeko, eta aukeratutako irizpideak betetzen dituzten pistak bistaratzen dituzte.

Arakatzailea bistaratzeko, hautatu Ikusi ▸ Arakatzailea. Hautatu artista, albuma eta generoa, eta, hautatu ahala, zure aukerekin bat datozen pistak bakarrik bistaratuko dira pista-zerrendan. Zutabeen irizpideak ezkerretik eskuinera aplikatzen dira.

Kategoria bereko hainbat irizpide batera aukeratzeko, erabili Ktrl tekla.

Pista-zerrendan hautatutako pista batetik ere bila ditzakezu genero, artista nahiz album bera duten pista guztiak. Hautatu pista bat pista-zerrendan, egin klik eskuin-botoiarekin, eta aukeratu Arakatu genero/artista/album hau. Arakatzaileak aukeratutako irizpideak betetzen dituzten pistak iragaziko ditu orduan.