Novidades para os usuarios

O Proxecto GNOME céntrase nos usuarios e a usabilidade continua mellorando en GNOME 2.32 mediante os centos de arranxos de erros e nas melloras solicitadas polos usuarios. O gran número de melloras fai imposíbel mostrar aquí cada un dos cambios feitos, porén estas notas tentan resaltar as características máis interesantes orientadas ao usuario.

GNOME 2.32 é a última versión principal da serie GNOME 2.X, polo que partires de agora só serán lanzadas versións de mantemento para o GNOME 2.x. GNOME 2.32 non ten unha sustanciábel cantidade de novas funcionalidades nos aplicativos xa que os desenvolvedores de GNOME continúan enfocando o seu traballo na preparación da vindeira versión GNOME 3.0 planexada para Abril do 2011.

2.1. Organice os seus contactos

O aplicativo de mensaxaría instantánea e comunicación de GNOME, Empathy, construído sobre o marco de traballo de comunicacións Telepathy, obtivo un gran número de novas e importantes características que axudan ao usuario a comunicarse e xestionar os seus contactos.

Empathy permítelle agrupar a información dos contactos de forma conxunta usando os metacontactos. Se un dos seus contactos usa varios servizos de mensaxaría instantánea agora pode ligalos de forma conxunta baixo o mesmo nome. Empathy tamén engadiu a posibilidade de encontrar de forma sinxela os seus contactos ao engadir a busca de contactos en vivo. Non ten máis que escribir na lista de contactos para buscar de forma rápida un contacto.

Empathy engadiu opcións para desactivar o rexistro, así como a desactivación da apertura automática das conversas entrantes. Empathy obtivo outras actualizacións para incluír a capacidade de configurar contas IRC usando o Asistente de contas, permitirlle aceptar certificados de servidores de forma manual, usar as iconas de estado desde o seu actual tema, obtivo melloras nas mensaxes dos erros de conexión e a habilidade de aceptar ou rexeitar eventos entrantes usando os botóns nas burbullas de notificación. Tamén pode ver información técnica sobre a súa chamada actual no panel de detalles do diálogo de son / vídeo e tamén reabrir un separador pechado usando «Desfacer» nunha xanela de conversa.

2.2. Melloras na compatibilidade de PDF

O visor de documentos Evince obtivo unha mellora na compatibilidade de accesibilidade mediante o uso da interface AtkText, que permite a Orca, o lector de pantalla de GNOME, ler documentos de Evince. O nivel de zoom máximo tamén foi incrementado ao ver un documento.

A compatibilidade de anotacións foi mellorada e agora pode engadir anotacións desde o panel lateral, no que pode cambiar as propiedades por omisión incluíndo o autor, a cor, a transparencia e moito máis.

Engadiuse a compatibilidade de SyncTex a Evince. SyncTex é un método que permite a sincronización entre un ficheiro de código fonte TeX e a saída PDF (ou DVI) resultante. Tamén se engadiu a compatibilidade de SyncTex en Evince como un novo complemento para gedit. Agora tamén é compatíbel coa busca cara atrás, desde Evince a gedit, e a Busca cara adiante, desde gedit a Evince.

2.3. Visualización de moitos máis ficheiros

GNOME 2.32 inclúe as últimas actualizacións de Nautilus, o xestor de ficheiros de GNOME. Nautilus engadiu un diálogo que lle axudará a xestionar os conflitos ao copiar e mover ficheiros. Agora Nautilus mostra as iconas transparentes para os ficheiros que cortou e vai pegar noutro cartafol.

Obtivo melloras na xestión dos ficheiros que eliminou e están no Lixo. Ao ver o cartafol do Lixo, hai un botón na barra de información que lle permite restaurar os ficheiros seleccionados. O cartafol de Lixo tamén mostrará a localización orixinal dos ficheiros eliminados e a data na que foron eliminados.

2.4. Pero agarde que isto non é todo...

Alén dos cambios máis importantes, tamén hai múltiples engadidos e axustes realizados como en cada nova versión de GNOME.

  • Ollo de GNOME, o visor de imaxes de GNOME, permítelle seleccionar unha cor de fondo de forma manual para mellorar o contraste da imaxe.
  • Totem, o reprodutor de filmes de GNOME, agora realiza o desinterliñado automático dos filmes ou dos fluxos que foron filmados con interliñado. Agora Totem ten unha lista de reprodución mellorada, polo aparecerá de forma máis rápida e responderá de mellor forma ao cargar as listas de reprodución.
  • Agora as Ferramentas do sistema de GNOME permítenlle aos usuarios cambiar o propietario dun ficheiro se foi movido ao seu cartafol persoal e xa está presente.